Selfoss heimsótti Fylki í Lautina í Árbæ í 1. deild karla í knattspyrnu í kvöld. Fylkismenn reyndust sterkari og sigruðu 2-0.
Leikurinn var opinn á upphafsmínútunum og Selfyssingar fengu frábært færi á sjöttu mínútu en boltinn fór í stöngina. Þegar leið á fyrri hálfleikinn hertu Fylkismenn tökin en Selfyssingar vörðust skipulega.
Eitthvað varð þó undan að láta og á 37. mínútu komust heimamenn yfir með marki frá Benedikt Daríusi Garðarssyni. Staðan var 1-0 í hálfleik.
Selfyssingar lágu til baka í seinni hálfleiknum og freistuðu þess að sækja hratt en varð lítið ágengt. Fylkismenn komust svo í 2-0 á 68. mínútu með marki frá Pablo Aguilera eftir að Selfyssingar höfðu tapað boltanum á slæmum stað í öftustu línu.