Kjartan Helgason, Umf. Hvöt, fékk góða heimsókn á 81 árs afmælisdaginn þegar formaður og varaformaður Glímusambands Íslands bönkuðu uppá og sæmdu hann gullmerki GLÍ fyrir langt og mikið starf í þágu glímunnar.
Kjartan stundaði nám í Íþróttaskóla Sigurðar Greipssonar í Haukadal veturinn 1961 til 1962 og kynntist þar glímunni. Keppnisferill hans náði yfir tuttugu ár og varð hann þrisvar sinnum Skjaldarhafi Skarphéðins 1981, 1984 og 1985.
Kjartan sá um þjálfun glímumanna á Borg í Grímsnesi frá 1979 til 1987 með mjög góðum árangri en margir af bestu glímumönnum Héraðssambandsins Skarphéðins fengu sína fyrstu kennslu hjá honum. Kjartan var formaður glímunefndar HSK í á annan áratug.