Kiðjabergsvöllur bestur þriðja árið í röð

Guðmundur Ásgeirsson og Jónína Magnúsdóttir á verðlaunaafhendingu World Golf Awards í Egyptalandi. Ljósmynd/Golfklúbbur Kiðjabergs

Kiðjabergsvöllur í Grímsnesi hefur verið valinn besti golfvöllur Íslands árið 2026 (Iceland’s Best Golf Course) af World Golf Awards. Þetta er þriðja árið í röð sem völlurinn hlýtur þessa virtu alþjóðlegu viðurkenningu.

Verðlaunaafhending World Golf Awards 2026 fór fram við hátíðlega athöfn á Madinaty Golf Club í Egyptalandi. Guðmundur Ásgeirsson, formaður Golfklúbbs Kiðjabergs, var viðstaddur hátíðina fyrir hönd félagsins og tók á móti verðlaununum.

Mikil viðurkenning fyrir metnaðarfullt starf
„Við erum ótrúlega þakklát fyrir þennan heiður. Að vera kjörinn besti golfvöllur Íslands árið 2026, og það þriðja árið í röð, er frábær viðurkenning fyrir allt það ómetanlega starf sem hefur verið unnið á Kiðjabergi í fjölda ára. Sjálfboðaliðar, starfsfólk og stuðningsfólk klúbbsins hafa öll lagt sitt af mörkum og án þeirra væri þetta ekki mögulegt. Þessi viðurkenning hvetur okkur til að halda áfram á sömu braut og gera völlinn enn betri. Það var jafnframt mikil ánægja og heiður að taka á móti verðlaununum fyrir hönd klúbbsins við glæsilega verðlaunaafhendingu World Golf Awards á Madinaty Golf Club í Egyptalandi,“ segir Guðmundur.

Vallarstarfsmenn vinna af metnaði og ástríðu
Guðmundur Fannar Vigfússon, framkvæmdastjóri Golfklúbbs Kiðjabergs, tekur í sama streng og segir verðlaunin endurspegla það metnaðarfulla starf sem unnið hefur verið á Kiðjabergi undanfarin ár.

„Það er mjög ánægjulegt að sjá Kiðjabergsvöll hljóta þessa viðurkenningu þriðja árið í röð. Þetta er mikil viðurkenning fyrir Golfklúbb Kiðjabergs og allt það góða starf sem unnið hefur verið við uppbyggingu og umhirðu vallarins í gegnum árin. Verðlaunin eru okkur jafnframt mikil hvatning til að halda áfram á þeirri vegferð sem við erum á og gera enn betur. Vallarstarfsmenn GKB hafa unnið af mikilum metnaði og ástríðu og þessi árangur er okkur öllum mikið ánægjuefni,“ segir Fannar.

World Golf Awards voru veitt í 13. sinn og eru hluti af World Travel Awards, sem hafa frá árinu 1993 veitt viðurkenningar fyrir framúrskarandi árangur í ferða- og þjónustugreinum um allan heim. Val á sigurvegurum byggir á alþjóðlegri atkvæðagreiðslu þar sem bæði fagfólk úr golf- og ferðaþjónustu og almenningur geta greitt atkvæði.

Golfvöllurinn á Kiðjabergi. Ljósmynd/GKB
Fyrri greinSelfoss áfram í bikarnum