KFR heimsótti Skallagrím í Borgarnes í fyrri leik liðanna í úrslitakeppni 5. deildar karla í knattspyrnu í dag.
KFR vann B-riðilinn í sumar en Skallagrímur varð í 2. sæti í A-riðlinum. Liðin mætast heima og heiman og samanlögð úrslit ráða því hvort liðið fer upp í 4. deildina.
Leikurinn í dag var í járnum allan tímann. Staðan var 0-0 í hálfleik en Elís Gylfason kom Skallagrím yfir þegar tæpt korter var liðið af seinni hálfleik. Fimm mínútum síðar jafnaði Hákon Kári Einarsson fyrir KFR og allt stefndi í jafntefli, þar til þrjár mínútur voru eftir af leiknum að Elís skoraði aftur og tryggði Skallagrím 2-1 sigur.
Seinni leikur liðanna verður á Hvolsvelli laugardaginn 6. september.