Keppni í 3. deild karla í knattspyrnu lauk í gær en KFR heimsótti Víði í lokaumferðinni og tapaði 4-1.
Heimamenn komust yfir á 24. mínútu og bættu við öðru marki tæpum tíu mínútum síðar, þannig að staðan var 2-0 í hálfleik.
Víðismenn gerðu svo út um leikinn með tveimur mörkum með stuttu millibili í upphafi síðari hálfleiks.
Markús Árni Vernharðsson klóraði í bakkann fyrir KFR á 76. mínútu og lokatölur urðu 4-1.
Sveinbjörn Jón Ásgrímsson, annar þjálfara liðsins, kom inná þegar fjórar mínútur voru eftir af leiknum og er hann líklega elsti leikmaðurinn sem leikið hefur með KFR á Íslandsmóti, 47 ára gamall.
Þá er ógetið frammistöðu varamarkvarðarins knáa, Magnúsar Kjartans Eyjólfssonar, en hann lék síðustu tuttugu mínútur leiksins og hélt búrinu að sjálfsögðu hreinu.
Rangæingar luku keppni í 3. deildinni í 8. sæti. Eftir frábæra byrjun í vor dalaði gengi liðsins töluvert og falldraugurinn var á sveimi í Rangárþingi. Hann var þó kveðinn niður fyrir skömmu og KFR lauk keppni með 18 stig, fimm stigum fyrir ofan Berserki sem féllu ásamt Álftanesi.