KFR er í toppsæti riðils-3 í C-deild deildarbikars karla í knattspyrnu eftir stórsigur á Vængjum Júpíters á útivelli í kvöld.
Liðin mættust í Grafarvoginum og þar var Helgi Valur Smárason búinn að koma KFR í 0-2 eftir níu mínútna leik. Vængir minnkuðu muninn á 27. mínútu en Bjarni Þorvaldsson skoraði fjórum mínútum síðar og KFR í vænlegri stöðu, 1-3. Vængir náðu hins vegar að jafna metin með tveimur mörkum á tveimur mínútum undir lok fyrri hálfleiks og staðan var 3-3 í leikhléi.
Seinni hálfleikur fór rólega af stað en síðustu tuttugu mínútur leiksins voru KFR piltarnir allsráðandi. Þeir skoruðu fimm mörk á lokakaflanum, Hákon Kári Einarsson skoraði þrennu og Böðvar Örn Brynjólfsson og Dagur Þórðarson bættu við mörkum og KFR vann ótrúlegan 3-8 sigur.
KFR er með 6 stig á toppi riðilsins en Vængir án stiga á botninum.