KFR sigraði BF108 í C-deild deildarbikars karla í knattspyrnu í dag en Uppsveitir töpuðu gegn Höfnum.
KFR tók á móti BF108 á Helluvelli en þetta var fyrsti KSÍ leikur meistaraflokks KFR á vellinum. Rangæingar virtust kunna vel við sig á þessum nýja velli og Helgi Valur Smárason og Bjarni Þorvaldsson skoruðu með stuttu millibili þegar rúmt korter var liðið.
BF108 missti mann af velli með rautt spjald undir lok fyrri hálfleiks og manni fleiri átti KFR ekki í neinum vandræðum með að landa sigri í seinni hálfleik. Bjarni bætti við öðru marki á 73. mínútu og Szymon Broniszewski innsiglaði svo 4-0 sigur KFR á 87. mínútu.
Uppsveitir lentu í miklum ólgusjó þegar þeir heimsóttu Hafnir í Reykjaneshöllina. Suðurnesjamenn voru mun sterkari og staðan var orðin 3-0 í hálfleik. Hafnir bættu svo við sex mörkum í seinni hálfleiknum og lokatölur urðu 9-0.
Í riðli-3 er KFR á toppnum með 9 stig en í riðli-1 eru Uppsveitir í 6. sæti, án stiga.