Knattspyrnufélag Rangæinga tapaði 4-2 þegar liðið heimsótti Kríu í 1. umferð 4. deildar karla í knattspyrnu í kvöld.
Kría komst yfir á 8. mínútu leiksins og í uppbótartíma fyrri hálfleiks kom annað mark frá heimamönnum sem leiddu 2-0 í hálfleik.
Einhverjir hefðu haldið að róðurinn væri orðinn þungur fyrir KFR þarna en Kristinn Ásgeir Þorbergsson var ekki á sama máli. Hann skoraði tvö mörk með stuttu millibili á fyrstu tuttugu mínútum seinni hálfleiks og jafnaði 2-2.
Kríumenn reyndust hins vegar sterkari á lokakaflanum. Þeir komust aftur yfir þegar korter var eftir af leiknum og fjórða mark Kríu leit svo dagsins ljós í uppbótartímanum. Lokatölur 4-2.