Knattspyrnufélag Rangæinga er í góðum málum þegar ein umferð er eftir af riðlakeppni C-deildar deildarbikars karla. KFR vann KB örugglega í kvöld og er með fullt hús á toppi riðils-3.
Liðin mættust á Leiknisvelli í Breiðholti og leikurinn var lengi vel markalaus.
Staðan var 0-0 í hálfleik og það var ekki fyrr en um miðjan seinni hálfleikinn að Helgi Valur Smárason kom KFR yfir með góðu skoti. Bjarni Þorvaldsson innsiglaði svo 0-2 sigur KFR á lokamínútu leiksins.
KFR er með 12 stig á toppi riðilsins og mætir Stokkseyringum í lokaumferðinni, sem fer ekki fram fyrr en 11. apríl.