Kenan áfram á Selfossi

Kenan Turudija skrifaði í vikunni undir nýjan tveggja ára samning við knattspyrnudeild Selfoss.

Þetta eru frábærar fréttir fyrir Selfyssinga en Kenan var besti leikmaður Selfoss á liðnu sumri og var kosinn besti leikmaður 2. deildar af fyrirliðum og þjálfurum í deildinni.

Fyrri samningur hans við Selfoss rann út eftir tímabilið en eftir að hafa hugsað málið ákvað hann að skrifa undir nýjan samning við Selfoss!

„Ástæðan fyrir því að ég ákvað að framlengja við Selfoss er sú að mér líður eins og heima hjá mér þar. Fólkið á staðnum og í kringum félagið kemur vel fram og það hafði mikil áhrif á ákvörðunina,“ segir Kenan.

Selfoss varð í 3. sæti í 2. deild karla á liðnu tímabili en mun eflaust gera atlögu að sæti í Inkassodeildinni á komandi sumri.