Mýrdalshlaupið fór fram í gær, sunnudag, degi seinna en fyrirhugað var. Hlauphaldarar ákváðu að morgni fimmtudags fyrir hlaupið að fresta hlaupinu um einn dag vegna leiðindaveðurs sem gekk yfir landið í gær.
Keppt er í 21 km leið með 1.100 metra hækkun og 10 km leið með 460 metra hækkun. Hlaupið var ræst kl. 11.00 í Víkurfjöru, þar sem um 400 manns röðuðu sér á ráslínuna. Keppni í 10 km hlaupi fór fram með hefðbundnu sniði. Vegna breyttra aðstæða á toppi Höttu, sem farið er upp á í 21 km keppninni, ákváðu mótshaldarar hins vegar að stöðva keppendur þegar leið á 21 km hlaupið þar sem aðstæður höfðu versnað til muna uppi á Höttu. Þá höfðu um 60 keppendur þegar haldið af stað upp á Höttu og tryggðu brautarverðir að þeir kæmust allir heilir heim.
Í karlakeppninni varð Arnar Pétursson fyrstur á tímanum 1:44,30 klst, Grétar Örn Guðmundsson hafnaði í öðru sæti á 1:49,35 klst og Jón Gunnar Eysteinsson í því þriðja á 1:49,55 klst.
„Þetta gekk í rauninni merkilega vel, ég komst heill í mark eftir að hafa tekið tvær byltur í brautinni, sem betur fer bara á góðum stöðum, í grasi og mosa, svo ég ákvað að taka þetta safe og rólega og komast í mark. Maður hugsar bara vá hvað það verður gaman að hlaupa niður síðustu brekkuna í góðum aðstæðum, að geta bara látið sig flakka! En hlaupið og brautin sjálf, brautarvarslan var uppá 10 og merkingarnar uppá 10, stemmningin uppá 10, svo þetta var mjög mjög skemmtileg upplifun og ég var alveg í mómentinu. Fyrir fram var maður farinn að hugsa útí brautarmetið, en þegar aðstæðurnar voru ljósar í morgun breyttist það markmið yfir í að halda hárri ákefð allan tímann og komast í mark,“ sagði Arnar að keppni lokinni.
Dalrós Inga Ingadóttir var fljótust kvenna í 21 km hlaupinu, en hún kláraði brautina á tímanum 2:11,28 klst. Á eftir henni kom Helga Bergsdóttir á 2:14,30 klst og Hulda Elma Eysteinsdóttir varð þriðja á 2:19,55 klst.
„Keppnin var geggjuð, mér leið mjög vel í brautinni og náði öllum mínum markmiðum. Veðrið slapp, en ég hefði ekki viljað vera mikið lengur í brautinni svo ég skil ákvörðun mótshaldara, um að loka brautinni, mjög vel. Markmiðið var að vera undir 2:15 og ég hljóp á 2:11 í erfiðum aðstæðum, svo ég er mjög sátt,“ sagði Dalrós Inga að lokinni keppni.
Brautarmet í 10 km hlaupi kvenna
Gestur Daníelsson sigraði 10 km keppni karla nokkuð örugglega á tímanum 41:42 mín sem er aðeins 36 sekúndum lengur en þegar hann vann 10 km keppnina í fyrra í frábærum aðstæðum. Í öðru sæti var Agnar Darri Sverrisson á 44:54 mín og í þriðja sæti var Gústaf Sæland á 46:09 mín.
„Þetta var krefjandi í ár, ég hljóp þetta í fyrra og veðrið var talsvert betra þá, svo þetta var miklu erfiðara í ár, en rosalega gaman. Brautin var mjög vel merkt þannig að þó það væri þoka og það var enginn að hlaupa í kringum mig þá var ég aldrei í vafa um að ég væri á réttri leið, sem er mjög gott. Þetta var mjög góð upplifun og skemmtilegt. Ég kem aftur á næsta ári,“ sagði Gestur að loknu hlaupi.
Fanney Þorbjörg Guðmundsdóttir vann kvennakeppnina í 10 km með nokkrum yfirburðum á tímanum 45:47 mín sem jafnframt er nýtt brautarmet í Mýrdalshlaupinu. Á eftir henni komu þær Sandra Dís Pálsdóttir 55:13 mín og fast á hæla hennar Þorgerður Gyða Ásmundsdóttur á 55:16 mín.
„Hlaupið var mjög gott. Það var rok og vindur í allar áttir, en þetta var ótrúlega skemmtilegt. Mitt plan gekk upp, ég lagði upp með að fara bara mjög hratt í dag, það var markmið dagsins og það gekk,“ sagði Fanney Þorbjörg að hlaupi loknu.
Eitt mest krefjandi utanvegahlaup landsins
Mýrdalshlaupið er hefur verið haldið í núverandi mynd frá því 2020 og hefur notið mikilla vinsælda og fengið það orðspor að vera eitt mest krefjandi utanvegahlaup landsins. Hlaupið hefur skipað sér fastan sess í hlaupadagskrá margra íslenskra utanvegahlaupara og nýtur vaxandi vinsælda erlendis frá, en í ár voru þátttakendur frá 15 löndum skráðir til leiks. Skipulag og framkvæmd hlaupsins er í höndum fjölskyldu sem ættuð er úr Vík, auk þess sem fjöldi sjálfboðaliða leggur hönd á plóg. Ungmennafélagið Katla, Jaðarsportklúbburinn Víkursport, Björgunarsveitin Víkverji og Kvenfélagið Ljósbrá styðja við framkvæmd hlaupsins með því að manna verkefni á hlaupdegi, auk vina og vandamanna.
