Franska goðsögnin Nikola Karabatic mætti „gömlum“ aðdáanda þegar Ísland lék gegn Frakklandi á heimsmeistaramótinu í handbolta í gærkvöldi.
Teitur Örn Einarsson hitti Karabatic í Laugardalshöllinni fyrir tíu árum síðan, þegar Teitur var 10 ára og fékk ungi aðdáandinn mynd af sér með stjörnunni. Athygli vekur að Teitur er klæddur frönsku landsliðstreyjunni á myndinni og því greinilega mikill aðdáandi Frakkanna.
Þeir hittust svo aftur í Lanxess-Arena í Köln í gærkvöldi þar sem Teitur fékk að taka á Karabatic og lét heldur betur finna fyrir sér, þó að Frakkarnir hafi sigrað að lokum.
Þuríður Ingvarsdóttir, móðir Teits, birti skemmtilega færslu á Facebook í gær eftir leik þar sem gamla myndin birtist með nýrri mynd úr leiknum í gær, í anda 10 ára áskorunarinnar sem gengur þessa dagana á samfélagsmiðlum.
Karabatic deildi færslunni Þuríðar á aðdáendasíðunni sinni og er greinilega ánægður með Teit: „Takk fyrir að deila. Guð minn góður, tíminn flýgur og í þetta skiptið óx barnið vel úr grasi.“