Hamar og KA mættust í Hveragerði í dag í þriðja leik liðanna um Íslandsmeistaratitil karla í blaki. Eftir hörkuleik og mikla spennu hafði KA betur, 3-1 og leiðir nú í einvíginu, 2-1.
Spennustig KA manna var greinilega rétt stillt í upphafi leiks. Þeir voru með yfirhöndina allan tímann á meðan ekkert gekk upp hjá heimamönnum, sem fundu greinilega fyrir því að þjálfarinn Tamas Kaposi er óleikfær. KA vann hrinuna hrinuna örugglega 25-18.
Í 2. hrinu var aftur á móti önnur saga. Hamarsmenn virtust koma betur stemmdir til leiks og var hrinan hnífjöfn allt til loka. Staðan var jöfn, 23-23, en Hamarsmenn reyndust sterkari á lokasprettinum og unnu hrinuna 25-23.
Þriðja hrina var engu síðri. Staðan var jöfn 11-11 en eftir það skriðu KA menn fram úr en Hamar jafnaði aftur, 17-17. Eftir hörku baráttu höfðu KA menn svo betur og unnu hrinuna 25-22.
Í fjórðu hrinu var engin breyting á og barist fyrir hverju stigi í vörn og sókn. Í stöðunni 17-17 skriðu KA menn fram úr og höfðu að lokum sigur, 25-22, og unnu leikinn þar með 3-1.
Marcin Graza var stigahæstur hjá Hamri með 18 stig.
Fjórði leikur liðanna fer fram á Akureyri á þriðjudaginn kemur og þar geta KA menn tryggt sér Íslandsmeistaratitilinn á heimavelli.