Knattspyrnudeild Selfoss hefur gengið frá kaupum á Jóni Vigni Péturssyni frá Aftureldingu og samið við hann til tveggja ára.
Jón Vignir snýr aftur heim á Selfoss eftir ársdvöl hjá Mosfellingum, þar sem hann átti þátt í að koma Aftureldingu upp í Bestu deildina.
Jón Vignir er uppalinn Selfyssingur og þarf vart að kynna fyrir stuðningsfólki félagsins. Hann hefur verið einn af burðarásum liðsins undanfarin ár og bar meðal annars fyrirliðabandið frá árinu 2023.
„Jón Vignir kemur nú heim reynslunni ríkari eftir árangursríkt tímabil með Aftureldingu. Það er mikið gleðiefni fyrir félagið að hafa tryggt sér krafta þessa öfluga leikmanns og leiðtoga á nýjan leik,“ segir í tilkynningu frá Selfyssingum.