Uppskeruhátíð Handknattleikssambands Íslands fór fram í höfuðstöðvum Símans í dag en þar voru veitt verðlaun til þeirra sem þótt hafa skarað fram úr með sinni frammistöðu á liðnu keppnistímabili.
Þjálfarar og leikmenn liðanna í deildunum kusu bestu leikmennina að lokinni deildarkeppninni og komu tvenn verðlaun í hlut Selfyssinga.
Í 1. deild karla var Jón Þórarinn Þorsteinsson, markvörður Selfoss, kosinn besti markmaðurinn og Carlos Martin Santos var kosinn besti þjálfarinn. Carlos verður áfram í brúnni á Selfossi á næstu leiktíð en Jón Þórarinn hefur samið við FH.
Þá má geta þess að Ída Bjarklind Gunnarsdóttir, leikmaður Víkings, var valin besti leikmaðurinn í 1. deild kvenna. Eins og sunnlenska.is greindi frá á dögunum mun Ída snúa aftur í heimahagana fyrir næsta tímabil og leika með Selfossliðinu í úrvalsdeildinni.
