Selfyssingurinn Jón Þórarinn Þorsteinsson hefur kvatt uppeldisfélagið sitt og skrifað undir tveggja ára samning við Handknattleiksdeild FH.
Jón Þórarinn, sem fæddur er árið 2003, á að baki fjölda landsleikja fyrir yngri landslið Íslands og var m.a. í liði Íslands sem árið 2023 vann bronsverðlaun á HM skipað leikmönnum 21 árs og yngri.
„Við FH-ingar erum gríðarlega ánægðir með að fá Jón Þórarinn til liðs við okkur. Hann er einn efnilegasti markvörður landsins og höfum við mikla trú að hann muni bæta sig enn frekar í FH-treyjunni á næstu árum,“ segir Ágúst Bjarni Garðarsson, formaður handknattleiksdeildar FH, í tilkynningu frá félaginu.