Fyrrum Íslandsmeistarinn Jón Örn Ingileifsson á Útlaganum kom sá og sigraði í Sindratorfærunni á Hellu í gær. Keppnin var æsispennandi og úrslitin réðust ekki fyrr en á lokametrunum í Mýrinni.
Eins og oft áður var frábær mæting á keppnina en 6.500 manns fylgdust með henni í blíðskaparveðri. Keppnin var einnig í beinni á RÚV2 og Youtube þar sem tugþúsundir fylgdust með.
Eftirvæntingin var mikil, 29 keppendur skráðir til leiks og þar á meðal fimm Íslandsmeistarar, þó að einn þeirra, Snorri Þór Árnason, hafi ekki náð að græja sinn bíl í tæka tíð.
Íslandsmeistarinn Ingvar Jóhannesson fór vel af stað og var í harðri baráttu við Bjarnþór Elíasson eftir tvær brautir. Bjarnþór hafði forystuna eftir þriðju braut en fjórða og fimmta braut voru tímabrautir. Í þeim báðum náði Ingvar besta tímanum og komst í toppsætið, meðal annars eftir magnaða fleytingu á Hróarslæk þar sem hann náði rosalegum tíma og uppskar mikið lófaklapp.
Hellutorfærunni lýkur að vanda í Mýrinni og þegar kom að henni var spennan gríðarleg enda áttu níu ökumenn ennþá möguleika á sigri. Ingvar hitti ekki á hlið og var dæmdur út úr braut á meðan Bjarnþór kláraði og komst á toppinn. Þá var komið að Jóni Erni sem hafði mjakað sér upp töfluna með öruggum akstri eftir því sem leið á daginn. Hann sló ekkert af, ók Mýrina refsilaust og hirti toppsætið með 31 stigs forskot á Bjarnþór. Ingvar þurfti að gera sér þriðja sætið að góðu, sex stigum á eftir Bjarnþóri.
Finnur fékk tilþrifaverðlaunin og Bjarki vann götubílaflokkinn
Finnur Aðalbjörnsson á Refnum sýndi frábæran akstur allan daginn, var óheppinn en bjargaði sér snilldarlega í tímabrautinni og hlaut tilþrifaverðlaunin að launum.
Í götubílaflokknum var það Bjarki Reynisson á Dýrinu sem stóð uppi sem sigurvegari, hann var útsjónarsamur alla keppnina safnaði stigum og klúðraði engu. Bíllinn hékk í lagi og Bjarki var vel að sigrinum kominn.
Sindratorfæran er orðinn stærsti akstursíþróttaviðburður á Íslandi og þangað mæta fleiri en á landsleik í fótbolta. Torfæran er að ná nýjum hæðum og keppendur hafa sjaldan verið fleiri. Næsta keppni fer fram í Stangarhyl við Laugarvatnsveg laugardaginn 31. maí. Það er önnur umferð Íslandsmótsins, sem og bikarmót svo þar má búast við mikilli baráttu og látlausum tilþrifum.
