Knattspyrnumaðurinn Jón Daði Böðvarsson hefur lagt skóna á hilluna eftir farsælan feril sem atvinnumaður.
Selfoss og Jón Daði tilkynntu um helgina um riftun samnings Jóns Daða sem hefur verið að glíma við meiðsli síðustu misserin og lítið spilað í sumar.
Jón Daði, sem er 34 ára gamall, tilkynnti svo á samfélagsmiðlum í dag að skórnir væru komnir upp í hillu.
„Ég velti því stundum fyrir mér hvernig mér lukkaðist að lifa drauminn. Þetta hefur verið rússíbanareið, hæðir og lægðir, en þegar upp er staðið er ég fullur þakklætis,“ sagði Jón Daði meðal annars í tilkynningu sinni.
Jón Daði lék sem atvinnumaður erlendis frá 2013 til 2025. Fyrst með Viking Stavanger í Noregi, síðan með Kaiserslautern í Þýskalandi en frá 2016 bjó hann á Englandi þar sem hann lék með Wolves, Reading, Millwall, Bolton, Wrexham og Burton Albion.
Hann gekk svo til liðs við Selfoss í júlí í fyrra, þegar liðið féll úr Lengjudeildinni. Hann spilaði 10 leiki í 2. deildinni í sumar og skoraði 3 mörk.
