Jólatörn hjá landsliðunum

Það verður nóg að gera hjá landsliðsfólki Umf. Selfoss í handbolta næstu dag. Fjöldi Selfyssinga mun æfa og keppa með yngri landsliðum Íslands.

Ómar Ingi Magnússon fer með U-18 landsliði Selfyssingsins Einars Guðmundssonar til Þýskalands en Hergeir Grímsson, sem sæti átti í liðinu, glímir við meiðsli og kemst ekki með.

Hrafnhildur Hanna Þrastardóttir er í æfingahóp U-20 ára landsliðs kvenna sem mun æfa saman í kring um áramótin og taka þátt í æfingamóti með liðum úr Olís-deild kvenna. Fyrsta æfingin er á morgun, föstudag, í Mýrinni í Garðabæ en liðið æfir undir stjórn Guðmundar Karlssonar og Halldórs Harra Kristjánssonar.

Dagmar Öder Einarsdóttir, Elena Birgisdóttir, Hulda Dís Þrastardóttir, Katrín Ósk Magnúsdóttir og Þuríður Guðjónsdóttir eru í U-18 ára landslið kvenna sem æfir frá 27. desember til 4. janúar. Liðið æfir undir stjórn Selfyssingsins Ingu Fríðu Tryggvadóttur og Hilmars Guðlaugssonar og þess má geta að seinasta æfingin fer einmitt fram á Selfossi laugardaginn 4. janúar milli kl. 12 og 14.

Þá er Karen María Magnúsdóttir í hópi fimmtíu stúlkna sem valdar hafa verið til æfinga með U-16 ára landsliðinu sem æfir 27. desember til 5. janúar í íþróttahúsinu að Varmá í Mosfellsbæ. Stúlkunum er skipt í tvo hópa, sem munu bæði æfa saman og sitt í hvoru lagi. Þjálfarar eru Halldór Stefán Haraldsson og Jón Gunnlaugur Viggósson.