Jana Lind glímudrottning Íslands í fyrsta sinn

Jana Lind (í miðjunni) og Marín Laufey (t.v.) ásamt Mörtu Lovísu Kjartansdóttur, UÍA, sem fékk bronsverðlaunin. Ljósmynd/Glímusamband Íslands

Jana Lind Ellertsdóttir, HSK, sigraði í kvennaflokki Íslandsglímunnar 2019 en keppt var um helgina í íþróttahúsinu við Strandgötu í Hafnarfirði.

Jana Lind sigraði Marín Laufey Davíðsdóttur, HSK, í úrslitaglímu en þær voru báðar með 3,5 vinninga eftir glímur dagsins. Jana Lind hlaut því Freyjumenið í fyrsta skipti.

Marín Laufey fékk silfrið en hún fékk einnig fegurðarverðlaunin Rósina, útskorinn farandgrip eftir Siggu á Grund.

Enginn karl keppti undir merkjum HSK á mótinu en Ásmundur Hálfdán Ásmundsson, UÍA, varð glímukóngur Íslands í fjórða sinn.