Árborg heimsótti Kríu í C-deild deildarbikars karla í knattspyrnu á Seltjarnarnesið í kvöld. Leiknum lauk með 1-1 jafntefli.
Leikurinn var heldur bragðdaufur í fyrri hálfleik og fátt um færi en Kríumenn nær því að skora. Staðan var 0-0 í hálfleik.
Þegar korter var liðið af seinni hálfleik spiluðu Árborgarar sig laglega í gegnum Kríuvörnina og Adam Örn Sveinbjörnsson batt lokahnút á sóknina með marki. Sú sæla varði þó ekki nema í fjórar mínútur því Kría jafnaði á 64. mínútu og þar við sat.
Árborg er í 3. sæti riðils-1 í C-deildinni með 7 stig en Kría í 4. sæti með 4 stig.