Ívar Ylur Birkisson, Íþf. Dímon, varð um helgina Íslandsmeistari karla í 60 m grindahlaupi á Meistaramóti Íslands innanhúss sem haldið var í Laugardalshöllinni.
Ívar Ylur hljóp á 8,45 sek og bætti eigið héraðsmet í flokkum 18-19 ára og 20-22 ára um 0,22 sek.
Sunnlendingar tóku silfur og brons í þrístökki karla. Veigar Þór Víðisson, Umf. Heklu, varð í 2. sæti með 12,25 m stökk og Daníel Smári Björnsson, Umf. Selfoss, varð í 3. sæti en hann stökk 11,92 m. Báðir bættu þeir sinn besta árangur í greininni.
Þá vann Anna Metta Óskarsdóttir, Umf. Selfoss, bronsverðlaun í þrístökki kvenna þegar hún stökk 11,33 m.