Íþróttir

Íris og Úlfar íþróttamenn ársins

2. janúar 2012 18:30

Körfuknattleikskonan Íris Ásgeirsdóttir og Úlfar Andrésson, íshokkímaður, hafa verið valin íþróttamenn Hveragerðisbæjar árið 2011.

Valið var tilkynnt á uppskeruhátíð menningar-, íþrótta- og frístundanefndar þann 30. desember sl.

Íris hefur verið burðarás í kvennakörfunni í Hveragerði til fjölda ára. Hún hóf feril sinn í barna og unglingastarfinu og lék með glæsibrag upp alla flokka. Hún var fyrirliði meistaraflokks kvenna á síðustu leiktíð þegar stelpurnar urðu deildarmeistarar Iceland Express deildarinnar 2011. Með því var stærsti titill körfuknattleiksdeildar Hamars, hingað til, í höfn. Íris hefur ekki leikið með Hamri á þessari leiktíð en hún er nú komin heim eftir þróunarstarf í Tanzaníu og mun spila með Hamri seinni hluta tímabilsins.

Úlfar hefur æft sína íþrótt af kappi og hefur fjölskyldan lagt mikið á sig varðandi æfingar því ekki er mögulegt að stunda íshokkí í Hveragerði. Úlfar er vinnusamur og metnaðarfullur íþróttamaður. Úlfar er fastamaður í karlalandsliði Íslands í íshokkí sem lenti í 3. sæti í 2. deild heimsmeistaramótsins sem haldið var í Króatíu í apríl.

Þeir íþróttamenn sem voru í kjöri til íþróttamanna ársins 2011 voru:

Hafsteinn Valdimarsson, blaki
Kristján Valdimarsson, blaki
Helga Hjartardóttir, fimleikum
Þuríður Gísladóttir, golfi
Gunnar Marel Einarsson, golfi
Marteinn Sindri Svavarsson, knattspyrnu
Íris Ásgeirsdóttir, körfuknattleik
Úlfar Jón Andrésson, íshokkí

Menningar-, íþrótta- og frístundanefnd heiðraði einnig fimm ungmenni sem voru landsliðsmenn, Íslandsmeistarar og bikarmeistarar á árinu.