Selfoss heimsótti ÍBV í úrvalsdeild kvenna í handbolta í dag. Eyjakonur reyndust sterkari þegar mest á reyndi og sigraði ÍBV að lokum, 31-26.
Jafnræði var með liðunum í fyrri hálfleiknum en ÍBV var lengst af skrefinu á undan og staðan var 16-13 í hálfleik.
Selfoss byrjaði vel í seinni hálfleik og jafnaði 20-20 þegar tæpar tíu mínútur voru liðnar. Þá tók ÍBV aftur við sér, þær juku forskotið í fimm mörk og byggðu þar upp forskot sem dugði þeim út leikinn.
Marte Syverud var markahæst Selfyssinga með 10/4 mörk, Eva Lind Tyrfingsdóttir skoraði 5, Adela Eyrún Jóhannsdóttir og Hulda Hrönn Bragadóttir 3, Arna Kristín Einarsdóttir og Emelía Ósk Aðalsteinsdóttir 2 og Sylvía Bjarnadóttir 1.
Sara Xiao Reykdal varði 6 skot í marki Selfoss og var með 16% markvörslu.
Selfoss er í botnsæti deildarinnar með 4 stig en ÍBV í 2. sæti með 30 stig.