Selfoss og Kormákur/Hvöt mættust á Hvammstangavelli í 2. deild karla í knattspyrnu í dag. Leikurinn var í járnum framan af en Selfoss setti í gírinn í seinni hálfleik og sigraði 2-5.
Kormákur/Hvöt komst yfir á 12. mínútu með glæsimarki af 30 metra færi en Viðar Örn Kjartansson jafnaði metin á 24. mínútu. Aron Fannar Birgisson slapp þá í gegn en markvörður Kormáks/Hvatar varði frá honum. Viðar var mættur í frákastið og renndi boltanum í tómt markið. Heimamenn áttu hins vegar lokaorðið í fyrri hálfleik og komust í 2-1 eftir snarpa sókn rétt fyrir leikhlé.
Viðar Örn var fljótur að jafna í seinni hálfleiknum en staðan var orðin 2-2 eftir rétt rúmar tvær mínútur. Viðar fékk boltann í vítateignum eftir sókn upp hægri kantinn og skoraði af harðfylgi.
Um miðjan seinni hálfleikinn kom svo ótrúlegur kafli hjá Selfyssingum sem skoruðu þrjú mörk á sex mínútum. Aron Fannar Birgisson breytti stöðunni í 2-3 með skoti af stuttu færi eftir klafs í teignum, Viðar Örn skoraði þremur mínútum síðar með góðu skoti úr teignum og Aron Lucas Vokes hélt upp á 22 ára afmælisdaginn með glæsilegu marki Selfoss á 69. mínútu.
Þar með voru úrslitin ráðin og Selfyssingar fögnuðu vel í leikslok. Þeir eru nú í 2. sæti deildarinnar með 26 stig en Kormákur/Hvöt er í 6. sætinu með 20 stig.
Leikurinn var í beinni á Selfoss TV fótbolti og má sjá hann hér að neðan.