Selfoss heimsótti Fram í Úlfarsárdalinn í úrvalsdeild kvenna í handbolta í kvöld. Framarar höfðu lengst af undirtökin og sigruðu að lokum 21-17.
Selfoss skoraði fyrstu tvö mörkin en Fram jafnaði 2-2 og eftir það var jafnt á öllum tölum þar til tíu mínútur voru eftir af fyrri hálfleik að Fram náði þriggja marka forskoti, 10-7. Staðan í hálfleik var 11-9.
Fram byrjaði seinni hálfleikinn af krafti og náði fimm marka forskoti og heimakonur höfðu örugga forystu allt fram á lokamínúturnar. Þá náði Selfoss að minnka muninn í tvö mörk, 19-17, þegar fjórar mínútur voru eftir. Þær vínrauðu fengu tækifæri til að saxa enn frekar á forskotið en fóru illa með sóknir sínar á lokakaflanum og Fram vann öruggan sigur þegar upp var staðið.
Hulda Dís Þrastardóttir skoraði 5 mörk fyrir Selfoss, Hulda Hrönn Bragadóttir 5/1, Perla Ruth Albertsdóttir 3, Eva Lind Tyrfingsdóttir 2 og þær Sylvía Bjarnadóttir og Emelía Ósk Aðalsteinsdóttir skoruðu 1 mark hvor. Selma Þóra Jóhannsdóttir varði 14 skot í marki Selfoss og var með 40% markvörslu.
Selfoss er í 6. sæti deildarinnar með 2 stig en Framarar eru ósigraðar á toppnum með 8 stig.