Hulda Dís Þrastardóttir og Hannes Höskuldsson voru útnefnd leikmenn ársins hjá handknattleiksdeild Selfoss þegar lokahóf deildarinnar fór fram í Hvíta húsinu á dögunum.
Hannes var einnig markakóngur karlaliðsins með 161 mark, Tryggvi Sigurberg Traustason var valinn sóknarmaður ársins og Elvar Elí Hallgrímsson varnarmaður ársins. Anton Breki Hjaltason var valinn efnilegasti leikmaðurinn og Alexander Hrafnkelsson hlaut baráttubikarinn.
Hjá kvennaliðinu var Hulda Dís sem fyrr segir leimkmaður ársins. Mia Kristin Syverud var markadrottning með 108 mörk og hún var einnig valin sóknarmaður ársins. Adela Eyrún Jóhannsdóttir var valin varnarmaður ársins og Emelía Ósk Aðalsteinsdóttir efnilegust. Baráttubikarinn kom í hlut Huldu Hrannar Bragadóttir.
Hjá U-liði Selfoss var Hákon Garri Gestsson valinn leikmaður ársins en hann var einnig markahæstur með 128 mörk.
Guðbjörg Gunnarsdóttir var útnefnd félagi ársins og fékk því Hildarbikarinn til varðveislu næstu tólf mánuði. Guðbjörg er hrikalega öflugur sjálfboðaliði og sjaldgæf sjón að mæta á leik í Set höllinni þar sem hún er ekki löngu mætt.
Þá voru veittar fjórar viðurkenningar fyrir leikjafjölda en Anton Breki Hjaltason, Jason Dagur Þórisson, Valdimar Örn Ingvarsson og þjálfarinn Carlos Martin Santos fengu allir viðurkenningu fyrir 100 leiki.