Lið HSK/Selfoss varð um síðustu helgi Íslandsmeistari í frjálsum íþróttum 15-22 ára þegar MÍ 15-22 fór fram á Þórsvelli á Akureyri. UFA hélt mótið að þessu sinni og tókst vel til og mikið af efnilegusta frjálsíþróttafólki landsins mætti til leiks.
HSK/Selfoss sigraði heildarstigakeppni mótsins með 468 stig. ÍR varð í öðru sæti með 292 stig og UFA endaði í þriðja sæti með 238 stig. HSK/Selfoss varð sömuleiðis Íslandsmeistari í þremur aldursflokkum, 16-17 ára og 18-19 ára kvenna og 18-19 ára karla.
Hjálmar bætti 46 ára gamalt héraðsmet
Fimm HSK met féllu á mótinu og þar náði Hjálmar Vilhelm Rúnarsson, Umf. Selfoss, meðal annars að bæta 46 ára gamalt héraðsmet Péturs Guðmundssonar, Umf. Samhygð, í kúluvarpi 17-18 ára pilta. Hjálmar Vilhelm sigraði í kúluvarpinu með kast upp á 14,59 m og bætti met Péturs um 73 sentimetra. Hjálmar Vilhelm tvíbætti sömuleiðis héraðsmetið í kringlukasti 18-19 ára pilta. Fyrra metið átti liðsfélagi hans Kristján Kári Ólafsson, 44,97 m. Hjálmar byrjaði á að kasta 46,56 m og bætti svo um betur með kast sem var 15 sm lengra. Hjálmar bætti svo þriðja Íslandsmeistaratitlinum í safnið með því að sigra í spjótkasti.
Bryndís Embla Einarsdóttir, Umf. Selfoss, varð Íslandsmeistari í spjótkasti og hún átti einnig sterka keppni í kúluvarpi þar sem sigraði með svakalegri bætingu þar sem hún tvíbætti HSK metið í flokki 16-17 ára. Fyrra metið átti systir hennar, Hildur Helga, 12,84 m en Bryndís bætti það með því að kasta 13,60 m og hún lengdi sig svo enn frekar með kasti upp á 13,88 m.
Ívar Ylur Birkissson, Íþf. Dímon, sigraði 100 m hlaupi og 110m grindarhlaupi í flokki 18-19 ára. Í grindinni kom hann í mark tímanum 14,07 sek, sem er undir héraðsmetinu í flokknum en meðvindur var of mikill og því ekki um bætingu að ræða.
Sunnlendingar rökuðu inn verðlaunum
Sunnlendingar unnu fjölmarga aðra Íslandsmeistaratitla. Magnús Tryggvi Birgisson, Umf. Selfoss, varð ferfaldur Íslandsmeistari í 15 ára flokki og þær Magnea Furuhjelm Magnúsdóttir og Ásta Kristín Ólafsdóttir, Umf. Selfoss, urðu tvöfaldir meistarar í sama aldursflokki. Í 16-17 ára flokknum unnu þær Helga Fjóla Erlendsdóttir, Íþf. Garpi og Anna Metta Óskarsdóttir, Umf. Selfoss, báðar þrjá Íslandsmeistaratitla og í 18-19 ára flokknum varð Stephanie Ósk Ingvarsdóttir, Umf. Heklu, tvöfaldur meistari. Þessi upptalning er alls ekki tæmandi á Íslandsmeistaratitlum Sunnlendinga sem voru fastagestir á verðlaunapallinum alla helgina.