HSK greiðir aðildarfélögunum aukagreiðslu

Frá Héraðsþingi HSK síðastliðið haust. sunnlenska.is/Guðmundur Karl

Stjórn Héraðssambandsins Skarphéðins hefur ákveðið að greiða aðildarfélögum sínum og sérráðum sérstaka aukagreiðslu í ljósi góðrar fjárhagsafkomu HSK á síðasta ári og vegna þeirra aðstæðna sem nú eru uppi í samfélaginu vegna COVID-19.

Þetta var ákveðið á fundi stjórnar í fyrradag. Upphæðin nemur 2,2 milljónum króna, en að óbreyttu hefði hagnaður sambandsins á síðasta ári verið rétt um 2,2 milljónir króna. Forsendur skiptingar eru þær sömu og við útdeilingu á Lottói árið 2020.

Ungmennafélag Selfoss fær hæstu greiðsluna, rúmlega 530 þúsund krónur, Íþróttafélagið Hamar tæplega 284 þúsund krónur og Íþróttafélagið Dímon og Ungmennafélagið Hekla fá rúmlega 104 þúsund krónur. Aðrar greiðslur eru undir 100 þúsund krónum, en lægstu greiðsluna fær Karatefélag Suðurlands, 147 krónur.

Ástæða mun betri fjárhagsafkomu HSK en áætlun gerði ráð fyrir, er að stærstum hluta vegna mun meiri tekna af Lottóinu.