Fimleikakonan Hrafnhildur Hanna Þrastardóttir og knattspyrnumaðurinn Jón Daði Böðvarsson voru útnefnd íþróttakona og íþróttakarl Umf. Selfoss 2012 á aðalfundi félagsins í síðustu viku.
Bæði náðu þau frábærum árangri í sínum greinum, Hrafnhildur Hanna var í stúlknaliði Íslands sem varð Evrópumeistari í hópfimleikum og Jón Daði var besti leikmaður Selfossliðsins í knattspyrnu og í lok keppnistímabilsins var hann valinn efnilegasti leikmaður Pepsi-deildarinnar.
Þórir Haraldsson hlaut Björns Blöndal bikarinn sem veittur er öflugum félagsmönnum og fimleikadeildin var valin deild ársins og hlaut UMFÍ-bikarinn.
Reikningar félagsins voru lagðir fyrir fundinn og stjórn félagsins kjörin en Kristín Bára Gunnarsdóttir var endurkjörin formaður.