Selfoss og ÍBV mættust í hörkuleik á Ragnarsmóti kvenna í handbolta í kvöld. Eyjakonur sigruðu að lokum með eins marks mun, 35-36.
Það var jafnt á flestum tölum fyrstu tíu mínúturnar en þá náði ÍBV fjögurra marka forskoti, 7-11. Selfoss skoraði þá fjögur mörk í röð og komst í kjölfarið yfir, staðan var 19-18 í hálfleik.
Seinni hálfleikurinn var jafn og spennandi en þegar um tíu mínútur voru eftir náði ÍBV fjögurra marka forskoti, 30-34. Selfoss skoraði hins vegar síðustu þrjú mörk leiksins og náði að minnka muninn í 35-36.
Perla Ruth Albertsdóttir var markahæst Selfyssinga með 8 mörk, Emelía Ósk Aðalsteinsdóttir skoraði 7, Eva Lind Tyrfingsdóttir og Hulda Hrönn Bragadóttir 6, Arna Kristín Einarsdóttir 4, Harpa Valey Gylfadóttir 3 og Sylvía Bjarnadóttir 1.
Selma Þóra Jóhannsdóttir varði 12 skot í marki Selfoss.
Þetta var annar leikur ÍBV á mótinu á tveimur dögum en í gærkvöldi sigruðu þær Víking örugglega, 29-49 eftir að hafa leitt 19-26 í hálfleik.