Utanvegahlaupið Kerlingarfjöll ULTRA var haldið í þriðja sinn í gær. Keppendur spreyttu sig á þremur hlaupaleiðum á miðhálendinu og tókust á við krefjandi aðstæður með bros á vör.
„Viðburðurinn gekk vonum framar og það er gaman að geta haldið þessa hlaupaveislu á hálendi Íslands ár eftir ár. Við erum hæstánægð með hlaupið og vel heppnað samstarf við Umhverfisstofnun, Björgunarfélagið Eyvind og Björgunarsveit Biskupstungna, hlauparana og alla okkar frábæru samstarfsaðila,” segir Katrín Steinunn Antonsdóttir, einn skipuleggjenda hlaupsins.
Hlaupaleiðirnar voru 12 kílómetrar, 22 kílómetrar og 60 kílómetrar og var mest þátttaka í 22 kílómetra hlaupinu, en þar voru 211 hlauparar ræstir út. Það var töfrandi stemning á hálendinu allan daginn, enda fjöldi hlaupara og
aðstandenda saman komnir í Kerlingarfjöllum.
Í fyrsta sæti í 60 km keppni karla var Helgi Halldórsson á tímanum 6:55,16 klst og í kvennaflokki var það Simona Vareikaitė sem fór með sigur af hólmi á tímanum 8:07,59 klst. Í 22 km vegalengdinni var það Sigurjón Ernir Sturluson sem sigraði í karlaflokki á tímanum 2:00,20 klst og Aðalheiður Ármannsdóttir sigraði í kvennaflokki á 2:30,40 klst. Í 12 km voru það Marínó Valdimarsson og Halldóra Arnardóttir sem sigruðu á tímunum 1:20,36 klst og 1:18,57 klst.
Hlaupaleiðirnar lágu um margar af perlum Kerlingarfjalla og má þar helst nefna hina mögnuðu Hveradali og Kerlingu, sem fjallgarðurinn dregur nafn sitt af. Á leiðinni er útsýni yfir miðhálendið og jöklana tvo sem fjallgarðurinn liggur á milli, Hofsjökul og Langjökul. Heildarhækkun í 60 km leiðinni, er um 2.100 metrar og þar munar mest um Sléttaskarð á milli Ögmundar og Hattar sem hlauparar klífa eftir um 34 km hlaup.
Markmið skipuleggjenda er ávallt að verja viðkvæmt landslagið og því er hlaupið skipulagt í nánu og góðu samstarfi við Umhverfisstofnun. Mikið er lagt upp úr því að lágmarka á umhverfið og landslag svæðisins, enda fer hlaupið fram á friðlýstu náttúruverndarsvæði. Keppendur voru sérstaklega minntir á að hlaupa ekki utan stíga, bæði fyrir hlaup og í brautinni sjálfri, og eins var það tryggt að hlauparar bæru með sér rusl á milli drykkjarstöðva svo ekkert sorp yrði eftir úti í náttúrunni. Eins voru gestir hvattir til að sameinast í bíla til að takmarka ágang.
„Íslendingar eiga mikið inni í heimsóknum á miðhálendið og við erum því stolt af því að geta boðið hlaupurum fyrsta flokks gistingu og góða aðstöðu hér í fjöllunum og að geta þannig kynnt þennan áfangastað fyrir bæði Íslendingum og erlendum gestum,“ segir Ingi Þórarinn Friðriksson, forstöðumaður Kerlingarfjalla við að lokum.
