Sá fáheyrði atburður varð á Þorláksvelli Golfklúbbs Þorlákshafnar síðdegis í dag að hjón fóru holu í höggi á sama hringnum.
Páll Ingvarsson reið á vaðið á tíundu holu vallarins, sem er par 3, er hann sló teighögg sitt beint í holu, af rúmlega 120 m færi, við mikla kátínu hans, eiginkonu hans Hólmfríðar M. Bragadóttur, og nærstaddra.
„Við vorum einmitt að gantast með þetta, eftir höggið mitt, að það væri nú gaman ef Hólmfríður næði þessu líka,“ segir Páll í frétt á Facebooksíðu GÞ. Viti menn, um klukkustund síðar lék Hólmfríður sama leikinn, þá á 15. holu, sem er einnig par 3.
Hólmfríður er enginn aukvisi þegar draumahöggið er annars vegar. Þetta er í fjórða sinn sem hún fer holu í höggi, en saman hafa þau hjónin stundað golfíþróttina í hartnær 18 ár. Þau eru bæði í Golfklúbbi Reykjavíkur. Hólmfríður er með 22 í forgjöf og Páll 19.
Í frétt golfklúbbsins segir að samkvæmt vefleitarvélum eru líkur á holu í höggi u.þ.b. einn á móti tólf þúsund og reiknar gervigreindin að líkur á afreki Hólmfríðar og Páls geti legið nærri 1 á móti 5,7 milljónum. Sé tillit tekið til fjölda árlegra golfhringja á Þorláksvelli, þá mun þetta afrek hjónanna tæpast endurtaka sig á vellinum næstu aldirnar.