Selfyssingurinn Hjálmar Vilhelm Rúnarsson náði frábærum árangri í tugþraut á Ólympíuhátíð Evrópuæskunnar sem lauk í Skopje í Norður-Makedóníu í gær.
Hjálmar hlaut 6.706 stig og endaði í 8. sæti, aðeins 27 stigum frá Íslandsmeti sínu í flokki U18 pilta. Þetta var virkilega flott þraut hjá Hjálmari en hann bætti sinn besta árangur í fjórum greinum, sigraði í tveimur greinum og var sem fyrr segir mjög nálægt sínum besta árangri í þraut. Hjálmar gerði þannig virkilega vel en aðstæður á frjálsíþróttavellum voru mjög krefjandi í 43-45°C hita.
Hjálmar var með lengsta kastið í kúluvarpi þegar hann kastaði 15,83 m og var aðeins 6 cm frá sínum besta árangri. Hann átti síðan langlengsta kast allra keppenda í kringlukasti þar sem hann kastaði 49,37 m, sem er hans næstbesta kast með 1,5 kg kringlu. Hann náði síðan frábærri bætingu í hástökki, bætti hann sig um þrjá sentimetra, stökk 1,97 m og setti nýtt HSK-met í flokki 16-17 ára pilta. Hann bætti 11 ára gamalt HSK met Styrmis Dan Steinunnarsonar, Umf. Þór, um einn sm. Myndband af metstökki Hjálmars má sjá hér neðst í fréttinni.
Bryndís Embla Einarsdóttir keppti í spjótkasti á mótinu og átti flotta frumraun á alþjóðlega keppnissviðinu. Hún kastaði 39,80 m og hafnaði í 14. sæti.
