Hjálmar Vilhelm Rúnarsson, Umf. Selfoss, gerði sér lítið fyrir og sló þrjú mótsmet í frjálsum íþróttum í flokki 18 ára á Unglingalandsmóti UMFÍ á Sauðárkróki um verslunarmannahelgina.
Hann bætti eitt HSK met í leiðinni, þegar hann kastaði 49,27 m í kringlukasti og bætti eigið héraðsmet í 18-19 ára flokki um 2,56 m.
Hin mótsmetin féllu í spjótkasti, þar sem Hjálmar kastaði 50,82 m og í kúluvarpi, þar sem hann kastaði 14,30 m.
Og eins og á öðrum Unglingalandsmótum keppti Hjálmar Vilhelm í nokkrum öðrum íþróttagreinum, meðal annars í stafsetningu, þar sem hann tók silfurverðlaunin.
