Meistaramót Íslands í fjölþrautum fór fram í Laugardalshöllinni helgina 14.-15.janúar. Nokkrir vaskir keppendur frá frjálsíþróttadeild Selfoss tóku þátt og stóðu sig frábærlega.
Hæst bar árangur Hjálmars Vilhelms Rúnarssonar í fimmtarþraut 15 ára og yngri. Hjálmar varð Íslandsmeistari með 2.892 stig sem er nýtt Íslandsmet í greininni en gamla Íslandsmetið var 2.727 stig. Árangur Hjálmars í einstökum greinum var eftirfarandi: 60 m grindarhlaup 9,57 sek, hástökk 1,75 m, kúluvarp 13,79 m, langstökk 5,60 m og 800 m hlaup 2:15,44 mín. Hjálmar bætti sinn persónulega árangur í fjórum greinum.
Í sömu þrautarkeppni varð Helgi Reynisson, Umf. Þjótanda, í 2. sæti en hann náði 1.543 stigum.
Í fimmtarþraut stúkna 15 ára og yngri varð Bryndís Embla Einarsdóttir Umf. Selfoss í 2. sæti með 2.747 stig. Helga Fjóla Erlendsdóttir, Garpi/Heklu, varð í 3. sæti með 2.681 stig og Hugrún Birna Hjaltadóttir Umf. Selfoss varð í 4. sæti með 2.369 stig. Þær bættu allar sinn besta árangur í þremur greinum.
Í sjöþraut pilta 16-17 ára náði Oliver Jan Tomczyk, Umf. Selfoss, frábærum árangri en hann varð í 2. sæti í með 3.675 stig. Hann bætti sinn besta árangur í fimm greinum af sjö.