Tveir Sunnlendingar eru fulltrúar Íslands á hinu virta Young Olympic Ambassadors (YOA) námskeiði sem fram fer í Ólympíu í Grikklandi dagana 6. til 18. júní næstkomandi.
Þetta eru þau Hildur Helga Einarsdóttir, frjálsíþróttaþjálfari og -keppandi frá Umf. Selfoss, og Ástþór Jón Ragnheiðarson, formaður Umf. Heklu í Rangárþingi ytra.
Námskeiðið er haldið á vegum Alþjóða Ólympíuakademíunnar og hefur það að markmiði að leiða saman ungt fólk á aldrinum 20–30 ára frá öllum heimshornum. Þar fá þátttakendur tækifæri til að dýpka þekkingu sína á gildum Ólympíuhreyfingarinnar og efla alþjóðleg tengsl.
Á dagskránni er meðal annars fyrirlestrar frá fræðimönnum og sérfræðingum, hópavinna og umræður um málefni íþróttahreyfingarinnar og menningarheimsóknir og íþróttaiðkun. Meginþema námskeiðsins í ár er „Að efla aðgengi, heiðarleika og ábyrgð fyrir alla íþróttamenn“. Dagskráin hefst í Aþenu og lýkur í hinni sögulegu Ólympíu.