Hergeir Grímsson, fyrirliði karlaliðs Selfoss í handbolta, er genginn til liðs við Olísdeildarlið Stjörnunnar.
Stjarnan greinir frá þessu á Facebooksíðu sinni og segir réttilega að um mikinn liðsstyrk sé að ræða. Hjá Stjörnunni hittir Hergeir fyrir sinn gamla lærimeistara, Patrek Jóhannesson.
„Hergeir er metnaðarfullur leikmaður sem kemur til með að lyfta öllum upp með sér. Við erum einstaklega stolt af því að loksins geta sagt ykkur frá nýjasta leikmanninum og hlökkum mikið til þess að vinna með Hergeiri á komandi tímabilum,“ segir Patrekur.
Hergeir hefur verið alger lykilmaður í liði Selfoss undanfarin ár. Í vetur skoraði hann 70 mörk í 22 leikjum og var einn fremsti varnarmaður liðsins.