Fjórir keppendur Umf. Selfoss settu samtals fimmtán HSK met á stökkmóti öldunga í frjálsíþróttum sem haldið var í Selfosshöllinni þann 2. maí síðastliðinn.
Guðmundur Kr. Jónsson, heiðursformaður HSK, var á meðal þátttakenda. Hann setti samtals fimm HSK met á mótinu, en hann tvíbætti met Jóns. M. Ívarssonar í langstökki án atrennu í flokki 75-79 ára og stökk lengst 1,90 metra. Þá þríbætti hann met Jóns M. í þrístökki án atrennu og stökk lengst 5,21 metra. Það er gaman að segja frá því að líklega eru 45 ár síðan Guðmundur Kr. setti síðast HSK met, en hann á enn HSK metin í sömu greinum í flokki 34-39 ára, sett árið 1981. Elsta HSK met Mumma, sem enn stendur, er í þrístökki 18-19 ára utanhúss og var sett á Laugarvatni 12. júlí 1965, viku eftir hið fræga Landsmót UMFÍ.
Kári Jónsson, bróðir Guðmundar, var á meðal þátttakenda og hann tvíbætti HSK metið í langstökki án atrennu í flokki 65-69 ára, stökk lengst 2,36. Tómas Jónsson átti metið og var orðið 28 ára gamalt. Páll Jökull Pétursson bætti svo einu meti við í safnið, en hann bætti eigið met í þrístökki 65-69 ára, stökk 6,08 metra.
Ólafur sonur Guðmundar Kr. keppti á mótinu, en fáir eða engir hafa sett fleiri HSK met í frjálsum en Óli. Hann setti engin met að þessu sinni.
Kristín Björg Albertsdóttir, fjórbætti HSK metið í hástökki án atrennu í flokki 60-64 ára kvenna á mótinu, stökk hæst 0,95 metra. Svo virðist sem þessi árangur sé einnig landsmet, en samkvæmt gagnagrunni FRÍ er þetta í fyrsta sinn sem kona á þessu aldursbili keppir á löglegu móti í greininni. Kristín þríbætti svo HSK metið í hástökki, stökk hæst 1,10 metra. í stökkseríunni náði hún að jafna landsmetið sem var 1,05m og bætti svo landsmetið við næstu hæð.