Sérstök valnefnd valdi kylfinginn Heiðrúnu Önnu Hlynsdóttur, Golfklúbbi Selfoss og júdómanninn Breka Bernhardsson, Umf. Selfoss, íþróttafólk ársins 2020 hjá Héraðssambandinu Skarphéðni.
Nítugasta og níunda ársþing sambandsins stendur nú yfir í fjarþingi og þar var valið kunngjört.
Þrátt fyrir ungan aldur er Heiðrún Anna fyrsta konan í GOS til að sigra mót á mótaröð GSÍ og spila með A-landsliði kvenna. Hún lék á síðasta ári á Evrópumóti kvenna í Svíþjóð þar sem íslenska landsliðið náði besta árangri Íslands frá upphafi á EM í golfi. Heiðrún varð á topp tíu á öllum mótum GSÍ á síðasta ári og var ein af fimm efstu íslensku konunum á heimslista áhugamanna í golfi á árinu 2020. Heiðrún varð klúbbmeistari Golfklúbbs Selfoss þar sem hún sló vallarmetið á fyrsta hring mótsins. Heiðrún stundaði nám í Coastal Carolina háskólanum í Bandaríkjunum og var lykilmanneskja í liði skólans í 1. deild bandarísku háskólamótaraðarinnar.
Breki Bernharðsson hefur verið fastamaður í íslenska júdólandsliðinu í -73 kg flokki á undanförnum árum. Hann varð í 3. sæti í sínum flokki á Reykjavíkurleikunum og í 9. sæti á Opna skoska júdómótinu í Edinborg og auk þess sem hann keppti á Opna danska júdómótinu í Vejle.
Fimmtán konur og þrettán karlar voru tilnefnd í kjörinu.
Fleiri verðlaun voru afhent á ársþinginu; Æskulýðsnefnd Hestamannafélagsins Sleipnis hlaut unglingabikar HSK, Golfklúbbur Selfoss hlaut foreldrastarfsbikar HSK og Ungmennafélag Selfoss sigraði í heildarstigakeppni sambandsins 2020. Þá var Sigmundur Stefánsson, Umf. Samhygð, útnefndur öðlingur ársins.
