Haukur og Barbára íþróttafólk ársins

Haukur Þrastarson og Barbára Sól Gísladóttir með verðlaunabikarana á íþróttavellinum á Selfossi í kvöld. sunnlenska.is/Guðmundur Karl

Handknattleiksmaðurinn Haukur Þrastarson og knattspyrnukonan Barbára Sól Gísladóttir voru í kvöld útnefnd íþróttafólk Ungmennafélag Selfoss árið 2019.

Kjörinu var lýst á verðlaunahátíð Umf. Selfoss sem haldin var í félagsheimilinu Tíbrá í kvöld.

Haukur er lykilmaður í liði Selfoss sem landaði sínum fyrsta Íslandsmeistaratitli í handbolta í vor. Hann var jafnframt valinn efnilegasti leikmaður Olísdeildarinnar. Á yfirstandandi tímabili er Haukur markahæsti leikmaður deildarinnar með 114 mörk. Haukur er fastamaður í landsliði Íslands og lék í janúar með liðinu á HM í Þýskalandi og varð þar með yngsti leikmaður í sögu Íslands til að leika á stórmóti í handbolta.

Barbára Sól er lykilleikmaður í kvennaliði Selfoss í knattspyrnu en liðið hampaði bikarmeistaratitlinum í fyrsta skipti í sumar eftir glæstan sigur á KR í framlengdum úrslitaleik. Í Pepsi Max deildinni varð liðið í þriðja sæti og jafnaði sinn besta árangur frá upphafi. Barbára spilaði alla leiki liðsins í deild og bikar á tímabilinu og lék þar að auki alla þrettán leiki U19 ára liðs Íslands á þessu ári.

Tveir íþróttamenn frá hverri deild félagsins voru tilnefndir í valinu og um leið verðlaunaðir sem íþróttamenn ársins í sinni grein. Þau eru Evelyn Jósefsdóttir og Sindri Snær Bjarnason fimleikar, Eva María Baldursdóttir og Dagur Fannar Einarsson frjálsar íþróttir, Hulda Dís Þrastardóttir og Haukur Þrastarson handbolti, Egill Blöndal júdó, Barbára Sól Gísladóttir og Guðmundur Tyrfingsson knattspyrna, Bjarki Breiðfjörð motocross, Sara Ægisdóttir sund og Dagný María Pétursdóttir og Þorsteinn Ragnar Guðnason taekwondo.