Handknattleiksmaðurinn Haukur Þrastarson frá Selfossi mun ganga í raðir pólska stórliðsins Kielce næsta sumar en pólskir fjölmiðlar greindu frá því í morgun að Haukur hafi gert þriggja ára samning við félagið.
Haukur, sem er 18 ára gamall, var hjá Kielce í september þar sem hann skoðaði aðstæður og ræddi við forráðamenn liðsins. Hann er talinn einn efnilegasti handknattleiksmaður í heiminum í dag og hefur verið lykilmaður í liði Íslandsmeistara Selfoss undanfarin ár.
Haukur var valinn besti leikmaðurinn á EM 18 ára landsliða á síðasta ári en hann hefur leikið 12 A landsleiki og skorað í þeim 15 mörk.
Kielce er ríkjandi meistari í Póllandi, áttunda árið í röð. Liðið hefur orðið bikarmeistari 11 ár í röð og sigraði í Meistaradeild Evrópu fyrir þremur árum.
Haukur er ekki fyrsti Selfyssingurinn sem mun leika með Kielce því hornamaðurinn geðþekki, Þórir Ólafsson, lék með liðinu árin 2011 til 2014.