Selfoss tók á móti Haukum í 1. deild karla í körfubolta í kvöld. Haukarnir svifu hátt framan af en spenna hljóp í leikinn í seinni hálfleik.
Haukar voru skrefinu á undan í fyrri hálfleik, Selfossvörnin var hriplek og staðan var 41-57 í hálfleik. Selfyssingar þjöppuðu sér saman í upphafi seinni hálfleiks og fóru á kostum í 3. leikhluta þar sem þeir minnkuðu muninn í 71-73 en staðan var 75-79 þegar fjórði leikhluti hófst.
Síðasti fjórðungurinn var æsispennandi og sveiflukenndur, Selfoss náði fimm stiga forskoti í upphafi hans en Haukar komu til baka og höfðu fimm stiga forskot þegar þrjár mínútur voru eftir. Haukar voru skrefinu á undan á lokamínútunum og sigruðu að lokum með átta stiga mun.
Aristote Bissokot var stigahæstur Selfyssinga með 29 stig og Avery Sullivan skoraði 22 og tók 9 fráköst.
Selfoss-Haukar 95-103 (18-28, 23-29, 34-22, 20-24)
Tölfræði Selfoss: Aristote Bissokot 29/5 fráköst, Avery Cordell Sullivan 22/9 fráköst/5 stoðsendingar, Tristan Máni Morthens 13/4 fráköst/5 stoðsendingar, Halldór Benjamín Halldórsson 11, Sigurður Darri Magnússon 7, Fjölnir Morthens 6/7 stoðsendingar, Óðinn Freyr Árnason 5, Gísli Steinn Hjaltason 2.