Botnlið Selfoss hafði ekki erindi sem erfiði þegar það heimsótti topplið Hauka í úrvalsdeild karla í handbolta í kvöld. Hafnfirðingar unnu öruggan sigur, 31-22.
Haukar leiddu frá upphafi og eftir rúmar fimmtán mínútur var staðan orðin 10-5. Selfoss náði að minnka muninn í þrjú mörk en Haukar juku forskotið aftur og leiddu 17-11 í hálfleik.
Selfoss byrjaði vel í seinni hálfleik og náði að minnka muninn í 20-18 en þá tóku Haukar við sér aftur og Selfyssingar náðu ekki að ógna þeim að neinu ráði á lokakaflanum.
Tryggvi Sigurberg Traustason var markahæstur Selfyssinga með 7/2 mörk, Hákon Garri Gestsson, Anton Breki Hjaltason og Hannes Höskuldsson skoruðu 3, Valdimar Örn Ingvarsson 2 og þeir Sveinn Ísak Hauksson, Guðjón Baldur Ómarsson, Skarphéðinn Steinn Sveinsson og Ísak Kristinn Jónsson skoruðu allir 1 mark.
Ísak Kristinn varði að auki 3 skot í marki Selfoss og var með 18% markvörslu og Alexander Hrafnkelsson varði 1 skot og var með 6% markvörslu.
Að loknum sex umferðum eru Selfyssingar í neðsta sæti deildarinnar með 1 stig en Haukar á toppnum með 12 stig.