Selfoss heimsótti Hauka í næstsíðustu umferð úrvalsdeildar karla í handbolta í kvöld. Selfoss þurfti sigur til að tryggja sæti sitt endanlega í deildinni en svo fór að Haukar tóku stigin tvö, 35-28.
Selfyssingar byrjuðu af krafti og komust í 1-4 en þá svöruðu Haukarnir og jöfnuðu 5-5. Eftir það var jafnt á öllum tölum upp í 14-14 en staðan var 17-16 í leikhléi.
Haukar voru mun sterkari á upphafsmínútum seinni hálfleiks og þegar korter var liðið af honum var staðan orðin 27-21. Selfoss náði að minnka muninn aftur í þrjú mörk en þá spýttu Haukarnir í lófana og unnu að lokum sanngjarnan sigur.
Hannes Höskuldsson var markahæstur Selfyssinga með 8/2 mörk, Hákon Garri Gestsson skoraði 7, Tryggvi Sigurberg Traustason 4, Sölvi Svavarsson 3, Guðjón Baldur Ómarsson 2 og þeir Álvaro Mallolz, Anton Breki Hjaltason, Elvar Elí Hallgrímsson og Jason Dagur Þórisson skoruðu 1 mark hver.
Alexander Hrafnkelsson varði 8 skot í mark Selfoss og var með 20% markvörslu og Philipp Seidemann varði 1 skot og var með 33,3% markvörslu.
Þegar ein umferð er eftir eru Selfyssingar í 10. sæti með 11 stig en þar fyrir neðan eru Stjarnan og ÍR með 10 og 9 stig. Selfoss mætir Aftureldingu í lokaumferðinni á fimmtudagskvöld í Set-höllinni.