Selfoss tók á móti Haukum í úrvalsdeild kvenna í handbolta í Set-höllinni Iðu í kvöld. Jafnræði var með liðunum í 45 mínútur en Haukar áttu góðan lokasprett og sigruðu 22-30.
Haukar náðu þriggja marka forystu í upphafi leiks en Selfoss jafnaði 6-6 og eftir það var leikurinn jafn fram að hálfleik. Selfoss leiddi 13-12 í leikhléi.
Selfoss hafði frumkvæðið fyrstu tíu mínúturnar í seinni hálfleik. Haukar voru ekki langt undan og þær jöfnuðu 17-17 þegar rúmt korter var eftir af leiknum. Gestirnir úr Hafnarfirði stýrðu síðan umferðinni síðasta korterið og juku forskotið hratt. Að lokum skildu átta mörk liðin að.
Hulda Dís Þrastardóttir var markahæst Selfyssinga með 6/4 mörk, Marte Syverud skoraði 4/2, Adela Eyrún Jóhannsdóttir 4, Eva Lind Tyrfingsdóttir 3, Hulda Hrönn Bragadóttir 2 og þær Emelía Ósk Aðalsteinsdóttir, Arna Kristín Einarsdóttir og Mia Kristin Syverud skoruðu 1 mark hver.
Sara Xiao Reykdal varði 9 skot í marki Selfoss og var með 24% markvörslu.
Fyrir lokaumferðina er Selfoss í 7. sæti með 6 stig en Haukar eru í 3. sæti með 25 stig. Selfoss mætir ÍR á útivelli í lokaumferðinni á laugardaginn.