Bikarævintýri Macclesfield FC á Englandi hefur ekki farið framhjá neinum fótboltaáhugamanni. Liðið, sem leikur í 6. deild, sló út ríkjandi bikarmeistara Crystal Palace í þriðju umferðinni og er talað um þann leik sem óvæntustu úrslit í sögu þessarar elstu og virtustu bikarkeppni í heimi.
Marinó Fannar Garðarsson á Selfossi er formaður Aðdáendaklúbbs Macclesfield á Íslandi og hann verður á Moss Rose, heimavelli Macclesfield í kvöld, þegar Macclesfield tekur á móti úrvalsdeildarliði Brentford í 32-liða úrslitum keppninnar.
Marinó Fannar, sem er annar stýrimaður á flutningaskipinu Helgafelli hjá Samskipum, var úti á rúmsjó þegar Macclesfield sló út Crystal Palace og viðbrögð hans við sigrinum fóru á flug á samfélagsmiðlum.
„Já, ég póstaði fagnaðarlátunum á Instagram og þau enduðu inni á miðlum félagsins og fóru víst ekki framhjá neinum þarna úti. Stuðningsmennirnir skoruðu í kjölfarið á Robert Smethurst, eiganda félagsins, að bjóða mér á leikinn og morguninn eftir vaknaði ég með skilaboð frá honum í símanum. Það var óraunveruleg lífsreynsla, þessi maður er algjör meistari sem keypti félagið á fylleríi árið 2020 og endurreisti eftir að það varð gjaldþrota. Hann var svona líka almennilegur og bauð okkur á leikinn,“ segir Marinó Fannar sem ferðaðist til Manchester um helgina ásamt konu sinni og syni.
Þetta er ekki fyrsta ferð feðganna á leik í Englandi í vetur því þeir voru á Arbour Park þegar Macclesfield sló út Slough Town í 2. umferð bikarsins.
Treyjan gerði útslagið
Stuðningsmenn Macclesfield eru líklega ekki margir á Íslandi en Marinó hefur fylgt félaginu dyggilega undanfarin fimmtán ár. Stuðningsmannaklúbburinn á Íslandi telur í dag 28 manns og er nóg rúm fyrir bætingu að sögn formannsins.
„Það eiga auðvitað nánast allir Íslendingar sitt lið í enska boltanum en ég var ekki fastur á neinum vagni. Ég var á fiskiskipi sem gerði út frá Eyjum í kringum 2011 og kynntist þar Englendingi sem var að vinna við löndun. Það kom upp úr krafsinu að hann væri frá Macclesfield, þannig að ég ákvað bara að styðja þetta ágæta lið og það sem gerði endanlega útslagið var að pabbi hans sendi mér treyju liðsins að gjöf og þá var ég seldur,“ segir Marinó og hlær dátt.
Fjölmiðlafár í kringum formanninn
Sem fyrr segir fóru fagnaðarlæti Marinós á flug á samfélagsmiðlum og það hefur vakið athygli Englendinga að þetta litla félag eigi stuðningsmann norður við heimskautsbaug. Síðustu daga hefur Marinó verið í viðtölum hjá fjölmiðlum úti vegna þessa og í morgun var hann í viðtali hjá BBC Breakfast, sem sex milljónir manna horfa á á hverjum morgni.
„Þetta er búið að vera ótrúlega skemmtilegt. Það var tekið viðtal við mig í podcastinu More Than A Match en það vill svo skemmtilega til að annar stjórnandi þess, D’Mani Mellor, er leikmaður Macclesfield. Mér brá svo fyrir í þætti um aðdáendur Macclesfield á TNT Sport þar sem sýnt var úr þessu podcasti. Síðan hafði Mike Bushnell hjá BBC samband við mig og tók viðtal sem sýnt var í morgunsjónvarpi BBC í morgun. Þeim finnst frekar merkilegt að Macclesfield eigi stuðningsmann á Íslandi og menn verða hissa þegar ég segi hvað ég er búinn að fylgja klúbbnum lengi,“ segir Marinó.
En hvernig fer leikurinn í kvöld?
„Ég ætla að segja að leikurinn fari 3-1 fyrir Macclesfield. D’Mani Mellor, Luke Duffy og fyrirliðinn Paul Dawson skora mörkin. Dawson sendi mér skilaboð í gær og hann er heldur betur til í slaginn. Ég er að deyja úr spennu,“ segir Marinó en þess má geta að markvörður andstæðinganna, Brentford, verður líklega landsliðsmarkvörðurinn Hákon Rafn Valdimarsson. „Ég hlakka til að sjá Hákon spila, það verður hans hlutverk að sækja boltann í netið.“
Þeir allra hörðustu fengu miða á leikinn
Marinó var staddur á hótelherbergi í Manchester þegar sunnlenska.is spjallaði við hann í gærkvöldi en bærinn Macclesfield er rúma 25 kílómetra sunnan við Manchesterborg. Formaðurinn átti ekki von á svefnsamri nótt.
„Það var lítið sofið síðustu nótt og ég held að það verði ennþá minna sofið næstu nótt. Það er ekki bara leikurinn, það er líka að fara á Moss Rose og hitta allt fólkið. Ég er búinn að kynnast mjög mörgum í kringum þetta havarí, bæði innan félagsins og öðrum stuðningsmönnum. Völlurinn tekur bara 5.300 manns og það voru bara allra hörðustu stuðningsmennirnir sem fengu miða á leikinn, þannig að það verður engin smá stemning þarna. Allir syngja með og nálægðin við völlinn er mikil. Það er hægt að gefa leikmönnunum fimmur þegar þeir skora. Þetta verður rosalegt!“