Hannes Jón riftir samningi sínum við Selfoss

Hannes Jón Jónsson. Ljósmynd/Selfoss

Hannes Jón Jónsson hefur rift samningi sínum við handknattleiksdeild Umf. Selfoss og mun ekki taka við þjálfun liðsins á næsta tímabili.

Hannes Jón og handknattleiksdeildin höfðu gert samkomulag um að hann tæki við þjálfun liðsins þegar Patrekur Jóhannesson hættir með Selfossliðið í sumar. Svo verður ekki og í tilkynningu frá Hannesi og Selfossi segir að báðir aðilar skilji í sátt.

Selfoss hefur hafið leit að nýjum þjálfara og mun deildin vinna það eins hratt og kostur er.

„Ég þakka handknattleiksdeild Umf. Selfoss kærlega fyrir skilninginn og að gera mér kleift að takast á við annað verkefni erlendis. Ég vil taka fram að forsvarsmenn handknattleiksdeildarinnar hafa verið fagmannlegir með eindæmum í öllum okkar samskiptum frá fyrsta degi. Árangur undanfarinna ára talar sínu máli og er engin tilviljun. Í mínum augum er Selfoss frábær kostur fyrir metnaðarfulla leikmenn sem vilja ná langt.  Að því sögðu vil ég óska handknattleiksdeild Umf. Selfoss alls hins besta og velfarnaðar,“ segir Hannes en hann hefur samið við Bietigheim í þýsku úrvalsdeildinni.