Hanna skoraði fjögur gegn Sviss

Selfyssingurinn Hrafnhildur Hanna Þrastardóttir skoraði fjögur mörk þegar íslenska kvennalandsliðið í handbolta tapaði 21-25 í æfingaleik gegn Sviss ytra í dag.

Ísland hafði fjögurra marka forystu í hálfleik, 16-12, en svissneska liðið náði forystu um miðjan síðari hálfleik og hélt henni allt til loka.

Þetta er annar leikur liðanna á tveimur dögum en Hanna komst ekki á blað í 23-27 sigri Íslendinga í gær. Hún skoraði hins vegar fjögur mörk í dag, eins og Ramune Pekarskyte, en Birna Berg Haraldsdóttir var markahæst með 8 mörk.

Þriðji og síðasti leikur Íslendinga og Svisslendinga í þessari lotu fer fram í Zofingen á morgun og hefst klukkan 17 að íslenskum tíma. Æfingaferðin til Sviss er liður í undirbúningi íslenska liðsins fyrir leikina gegn Svartfjallalandi í undankeppni HM, en þeir leikir fara fram í júní.