Hanna með slitið krossband

„Ég fékk niður­stöðurn­ar úr mynda­töku í há­deg­inu [í gær] og það er ljóst að ég er með slitið kross­band,“ segir Hrafn­hild­ur Hanna Þrast­ar­dótt­ir, landsliðskona í hand­bolta, og einn al­besti leikmaður Olís-deild­ar­inn­ar.

Morgunblaðið greindi frá þessu í gær.

Hanna sleit fremra kross­band í vinstra hné, í lands­leik gegn Hollandi fyr­ir helgi, og má reikna með að hún verði frá keppni í 9-12 mánuði. Hún mun því varla spila fleiri leiki með Sel­fossi á þessu ári, og verður að fresta áform­um sín­um um að fara utan í at­vinnu­mennsku.

„Þetta er pínu áfall og svekkj­andi, en svona er lífið þegar maður er í íþrótt­um. Það þurfa all­ir að taka út sinn skammt af meiðslum. Maður lít­ur bara á þetta sem verk­efni sem ég þarf að leysa og von­andi kem ég sterk­ari til baka,“ sagði Hanna í samtali við mbl.is.

Meiðsli Hönnu eru ekki bara áfall fyr­ir hana sjálfa held­ur einnig ís­lenska landsliðið og Sel­foss. Sel­fyss­ing­ar eru vænt­an­lega á leið í um­spil við lið úr 1. deild um sæti í Olís-deild­inni á næstu leiktíð, og Hanna þarf nú að treysta á liðsfé­lag­ana:

„Ég hef fulla trú á þeim. Það kem­ur bara maður í manns stað og von­andi sýna þær hvað í þeim býr, eins og þær hafa oft gert áður,“ sagði Hanna.

Frétt mbl.is